Serokê Amedsporê Aziz Elaldı li ser vexwendina klûbên Ewropayê ji bo 3 hefteyan çû Ewropayê.
Serokê Amedsporê Aziz Elaldı li ser vexwendina klûbên navdar ên cîhanê Barcelona, Atletico Bilbao û klûbên Fransî Bordeaux û Lens’ê ji bo 3 hefteyan çû Ewropayê. Di serdana Serokê Klûba Amedsporê Aziz Elaldı û rêveberên klûban de ji bilî sûdwergirtina ji ezmûna klûban, dê danûstandinên veguheztina lîstikvanan jî bên kirin.
Elaldı di axaftina li Lijneya Giştî de ev gotin kirin: “Îro, klûbên pêşeng ên Ewropayê ji ber vê serkeftinê gelek caran me vedixwînin. Bi taybetî klûba Lensê ji Amedsporê xwest bibin du tîmên bira.”
Rawestgeha Yekem Spanya ye
Di gera duhî dest pê kirî de, pêşîkê dê klûba Katalan a Spanyayê ya navdar Barcelona bê ziyaretkirin. Tê çaverêkirin ku di vê serdanê de Serokê Klûba Barcelonayê Joan Laporta û Serok Elaldı wê bicivin. Elaldı paşê dê serdana Atletico Bilbao’yê jî bike ku yek ji klûbên welatê Baskê ye.
Rawestgeha Duyem Fransa ye
Piştî serdanên li Spanyayê, Amedspor wê biçe Fransayê ji bo serdana tîmên Bordeaux û Lensê. Li ser daxwaza Lensê tê çaverêkirin ku Amedspor bi tîma Lensê re hevpeymana biratîyê girê bidin. Armanca civînan ew e ku ji nêrîn û zanîn û serpêhatîyên hev sûdê werbigirin û veguhêzin li ser pêşkeftina klûban, strukturên wan û ezmûnên wan ên di warê tesîs û binesaziyê de.
Aziz Elaldı Kî ye?
Serokê Rûmetê yê Azel Înşaatê Azîz Elaldı, di sala 1970yê de li Çewligê hatiye dinyayê. Elaldı ku bi salan e bi mitehidîyê re mijûl e, di heman demê de bi tûrîzm, xurek û gelek sektorên din re jî mijûl bûye. Aziz Elaldi serokê Konfederasyona Konfederasyona Înşaatan Dîmder’ê ye, her weha endamê lijneya rêveberiya Tûmbîkon’ê ye.
Azîz Elaldî piştî bûyî serokê Amedsporê da zanîn ku armanca wan Super Lig e. Elaldı her weha tekez kir ku ji aliyê cîhana bazirganiyê ve piştgiriyeke mezin ji bo klûba wan heye û daxwaz ji temaşevanan jî kir ku piştevaniya wan bikin.
