Tîma kurdan a Başurê Kurdistanê Duhok FC di Lîga Tîmên Şampîyon ên Kendava Ereban de bû şampîyon. Duhok FC li beramber tîma Qûweytê ya bi navê Al-Qedsia’yê di yarîya/pêşbirka rovanşê de 2-1 bi ser keft û bû şampîyon. Yarîya yekem 0-0 xilas bûbû. Ev şampîyonbûn, li çar alîyên cîhanê ji hûran bigire heta giran ji hêla hemî kurdan ve bi coşeka mezin hate pîrozkirin.
Demên Giring ji Yarîyê
Tîma bihêz a Başurê Kurdistanê di fînala Lîga Tîmên Şampîyon ên Kendava Ereban (AGCFF Gulf Club Champions League) de li mala xwe bi tîma Qûweytê Al-Qedsiayê re yarîya rovanşê lîst. Nîveka yekem bêyî gol xilas û di destpêka nîveka duyem de, di xuleka 66ê de li ser navê Duhok FC’yê Sîyamend Egîd tîma xwe 1-0 pêş xist.
Vê rewşê gelek dewam nekir û piştê bi çar xulekan anku di xuleka 70yê de Mohamed Soula li ser navê tîma xwe Al-Qedsiayê gola beranberîyê avêt. Paşê piştgirîya xurt ya alîgirên xwe ve tîma kurdan di xuleka 90+2yê de vê carê bi yarîzanê xwe Marlon dos Santos 2-1 kete pêşîyê. Dadwerê pêşbirkê wekî dema nehatî leyîstin 11 xulekan pêşbirk dirêj kir û di xuleka 90+15yê de ji Duhokê Peter Gwargis karta sor xwar û pêşbirk bi vê skorê qedîya û Duhok FC bû şampîyon.
Li stadyuma Duhokê bi dehhezaran alîgirê tîma Duhokê cihê xwe girtibûn û ji serî heta binî bi hêzeka mezin piştgirîya tîma xwe kirin. Her weha gelek rêveber û endamên sîyasî yên hikûmetê û partîyan jî li protokole cihê xwe girtin. Duhok FC tîma yekem Kurdistana Başur e ku dibe di vê qadê de bûyî şampîyon. Li bajêr pîrozbahî berdewam in.
Amedsporê bi Belavkirineka Taybet Serkeftina Duhok FC’yê Pîroz Kir
Piştî şampîyonîya Duhokê gelek alîgirên sîyasî û hunermend û kesên navdar û rêxistinan ev serkeftina wê pîroz kirin li her çar alîyên cîhanê ji alîyê gelek dam û dezgeh û cihên giring ve. Bê guman yek ji wan serokê hikûmeta Kurdistana Başur e ku di vî warî de keyfxweşîya xwe anî ziman.
Yek ji pîrozkerên giring jî bê guman tîman Kurdistana Bakur Amedspor e. Amedporê bi belavkirineka taybet ev serkeftina Duhokê pîroz kir: “Em tîma me ya bira Duhoksporê pîroz dikin ku bi serkeftina di fînala Lîga Şampîyonên Kendava Asyayê de bûye şapîyon.”
Ev kiryara Amedsporê ji alîyê kurdan ve gelek hate ecibandin û bû cihê şanazîyê. Her weha gelek hunermend û navdarên kurd jî serkeftina Duhokê pîroz kirin li ser medyayên civakî.
