Na hîkaye terefê Seyîdxan Kurijî nusîya ya. Na hîkaye kitaba Seyîdxan Kurijî Grev de vîyarena. Hîkaye de serebûtê, bajarê Çewlîk qeza ya Dara hênî de vîyarenê. Nuştox, derheqê Çewlîg cehde û çarşûyê Çewlîk ra çend agahîyan dano. Şarê Çewlîk qehwexaneyanê nê cehde de ronîşenê û terraqe kenê. Babeta înan zafane meseleyê kurdan û tarixê Kurdîstanî ser o beno. Ey rojan de newe-newe tayê kovar û rojnameyê kurdan vecîyayê. Hîkaye, mabeynê Xal Reşît û Sîdarî de vîyarena.
Sîdar, xortêk ciwan o. O qehwexaneyan ra geyreno û rojnameyan vila keno. Rojêk yeno qehwexaneyê ke Xal Reşît tede ronişteyeyo. Sîdar bi vengêk berz vecîyayîşê rojnameyê Vengê Kurdistanî mijdan dano û rojnameyan vila keno. Xal Reşît wextêk no rewşe vîneno terteleyê Şêx Seîdî yeno vîrê ey dekuweno mîyanê xeyalan. Dima warizeno qehwexaneyî terk keno. Çend rojî dima Sîdar reyna yeno qehwexane, wextê nimajê êreyîyo. Embazê Xal Reşîtî vanê ma şîyerê camî la Xal Reşît vano wextê nimajê êreyî hîra yo ez badê keye de nimajê xo kena. Xal Reşîd no hewa nêşêno camî û çim Sîdarî rê şikneno ke bêro hetê ey. Xal Reşît behsê xo keno ke semedê çira a roje vecîyayo şîyo teber. Xal Reşît Sîdarî ra vano wextêk mi mijdanê to goştarî kerde ez dekewta mîyanê xeyelan. Wextê terteleyê Şêx Seîdî ame mi vîr. Bermî kewt çimanê mi coka mi nêeşkena vindera ez vecîyaya teber.
Gorêyê hîkaye Xal Reşît wextêk Sîdarî veyneno zaf zerweş beno ûkeyfê ey yeno û wazeno ke sey Sîdarî xort bibîyo. Yewna pol ra terseno çunke o wextê xo de zaf çîyêk dîyo û zaf dej anto. Xal Rêşît sey Sîdarî xortan bêtecrube vîneno. Terseno ke Wextê terteleyê Şêx Seîdî de çîyêk dewlet ardo sereye înan ser, bêro sereyê sey Sîdarî xortan zî ser o. Semedê nê ra Sîdarî agahdar keno û meseleyêk ey rê vano. Xal Reşîd, hema des-diyês serre bîyo çend cendirmeyî yenê Çewlîk. Şenik-xişin, gede-pîl heme şarê Çewlikî top kenê. Serleşkerê înan milet ra vano bêrê ma şimarî zebeşan danê. Dima cendirmeyê telîsan vecenê ke zebeş nîyê sereyê însananê. Sereyê pîlanê Kurdan ê. Xal Reşît ey wext de tersayo û hema zî tersê ey dewam keno. Xal Reşît na mesela ser o wazeno ke Sîdarî agahdar bikero ke henek û rehma na dewlet çinîya.
Merdim wextêk sernuşteyê hîkaye waneno hîkayeyêk komîk fikirîyeno la seke sernuşte de zî esto hîkaye trajedîk yew hîkayeya. Eskerî seranê şarê Çewlikî zebeşan ra bêqîymetêr vînenî. Nuştox, na hîkaye de serewedaritişê Şêx Seîdî dawayêk neteweyî vîneno. Zilmo ke dewlet wextê Şêx Seîdî de kurdan rê kerdo tesîrê ci zaf bîyo. Tesîrê zilm o zordarî ya dewlet Xal Reşîtî ser o wendoxan rê ameyo şirovekerdiş. Şarê kurdan zaf tersayo û wextêk sey Sîdarî xortan vînenê, tersenî ke zilm û belayêk bêro sereyê înan ser o. Yew pol ra çend bitersê zî wextêk semedê dewa ya heq û hiquqê kurdan vînenê kêfweş benê.
