Ça dibêjît wusa ye. Min cîyekî antîk de xwe bîr kirî ye.. Digerim nagerim xwe nabînim. Heft qat li binê erdê qeynî, dibe ku li zêdetir. Derê cîhanê li ser pişta min bûye barekî giran. Dinalim, difetisim.. Reqs digirin perperok li ser bircên dilê min; yek, didu, sisê… Dimirin paşê. Baskên şikestî dibin xubar, hûr hûr dibarin. Dirêj ê çi bikim destê xwe, tê da dimîne. Weke miroveka felcê lêxistîye. Silûetên yên çûyîya der dorên min girtî ye.
Yanê dibêjim ku te qet wenda kirîye xwe? Tu qet bûyî sirûdeke bêxwedî, axeke bêav, çoleka bêsitirî? Dilan bêtir, keviran hêz girtîye Sîrya. Ku da kaş bikim hemû wan paradoksan…
Kes nahêle çivîk xwe li ser rêya min dayînin. Ger waqasî nebe tarîtî. Piştî şilîyan me keskesor didît. Pey berfên şilope re berfîn vedibûn. Gilîdax ewqasî ne qirêj bû wek mînak. Dawî ne girîng e, tiştek kêm e. Rê bi rê, bajar bi bajar, zozan bi zozan meşandin pewîst e niha. Bifikire ku tu di dilê zarokekî de bafirokek î. Encamê nexwaze, bigihêje ezmanan, bi ser de ewr. Lê belê neyê, tew neyê!.. Hatin îxanet e, vemirandina hêvîya ye.
Bifikire ku tu deqekî li ser enîya jinikek î. Janên bi hezar salan tê da hatîye veşartin. Bifikire ku tu tûtineka tehl î li ser lêva bavekî dest qusandî. Hêj hewareka din nehatiye, têr temîz bifikire.
Heke na bimirim ez ê. Niftek di cigerê min de dişewite. Eva tenê ne îsyana min e, tenê ne birîna min e: ew ez im, ew tu yî, ew em in. Tu kijan afirandêr re bawer dikî nizanim lê bide li ser navê wî û guh bide; gazî dikim, bibihîze¡ Perperokên bêbask, ewilî ji dayik dibin, paşê xeyalên wan difirin li ser çîyayên bêsînor. Di dawîyê da dimirin, ew jî dimirin Sîrya!.. Çima bê bersiv dimînin qêrîn… Diayên naletî ketine pêsîra me, ti carî jî bernadin. Di hestîyan da jehra marekî mê tewaf dike , diguvişîne berdide.
Bê lome ey Yezdan! Veguherîn pewîst e.
Bê lome ey Yezdan! Dadgeh bêşêwaz in.
Bê lome ku sêwî bêxweyî ne.
Di devên tobekar de kufir hêşîn dibin dîsa li wan rojan. Nikarin di hûndir de bi dûrinin êdî birîn û kulên xwe em.
Nayê girtin, xwîn tê rijîn.
Nayê girtin, çerm tê qelişandin.
Va nayê girtin çimkî tê ji bîr kirin.
Ne ez peykerek im ne jî dem Birahîm e.
Lê, lê belê rojekî hemû pûtên bê pergal yê wergerîn..
