Li Amedê piştî 9 salan careka dî xelatên pêşbazîya nivîsîna lîstikên kurdî ya Evdirehîm Rehmî Hekarî hatine belavkirin.
Pêşbazî, piştî 9 salan careka dî ji alîyê Şaredarîya Mezin a Amedê ve hate lidarxistin. 7. Pêşbazîya Nivîsîna Lîstikên Kurdî ya Evdirehîm Rehmî Hekarî bi merasîma xelatan li Navenda Çand û Kongreya ÇandAmedê bi coşeka mezin hate lidarxistin. Berîya merasîmê lîstikvanên Şanoya Bajêr a Amedê lîstika bi navê “Jîn”ê lîstin û şeveka xweş ji temaşevanan re çêkirin.
Ji pêşbazîyê re bi giştî 45 berhem hatibûn hinartin. Endamên jûrîyê “Qudbeddîn Sadiqî, Kawa Şêxe, Rûgeş Kirici, Şîlan Alagoz û Helket Idrîs berhem bi baldarî nirxandin û xelatgir dîyar kirin.
Encamên Pêşbazîyê
– Xelata Yekemîn: Bi berhema “Kela Dimdimê” ya Îbrahîm Kazimî.
– Xelata Duyemîn: Bi berhema “Sîyabend” ya Berat Şahin Beyoğlu.
– Xelata Sêyemîn: Bi berhema “Heyran ka Em jî Hinekî Sîyaset Bikin” ya Ahmet Bilge.
– Xelata Mansîyonê: Bi berhema “Dîno” ya Mesûd Arif
Pêşkêşvanê merasîmê lîstikvan Ömer Şahîn bû. Şahîn bal kêşa ser kêmasîya nivîsîna metnên şanoyê yên kurdî û got ev pêşbazî ji bo pêşketina şanoya kurdî gaveka giring e.
Rêvebirê Beşa Şanoyê Tahir Baykuşak di axaftina xwe de behsa jîyan û mîrateya Evdirehîm Rehmî Hekarî kir ku navê pêşbazîyê lê hatîye kirin. Got, Hekarî di sala 1890î de li Elbakê ji dayik bûye, li Medreseya Xorxorê ya Wanê ji Saîdê Kurdî ders wergirtîye, di Şerê Cîhanê yê Yekemîn de dîl ketîye destê rûsan û di vê serdema esaretê de berhema xwe ya “Zarokekê Dîl” nivîsîye. Piştî şerî bûye yek ji pêşengên tevgera ronakbîrîyê ya kurdî ya Stenbolê û bi lîstika “Memê Alan” bingeha şanoya kurdî ya modern avêtîye ku di sala 1919an de di kovara Jînê de hatîye weşandin.
Pêşbazî armanc dike ku repertûwara şanoya kurdî dewlemend bike û metnên nû derxe holê. Herî dawî ev çalaki li sala 2016an hatibû lidarxistin bi cara şeşemîn, piştî navbereka dirêj careka dî ji şanoger û şanonivîsan re derfet çêkir. Rayedaran hêvî kirin ku pêşbazî bibe edet û ji şanoya kurdî re bibe alîkareka mayînde.
